Production Management Career Tips

بسم الله الرحمن الرحيم

الناجح يرفع إيده

(1)

أصدقائي و إخوتي طلبة كلية الهندسة

السادة مهندسي الإنتاج بإختلاف سنين خبرتهم

زملائي الإعزاء

أهلا و مرحبا بكم في أول مقالات هندسة الإنتاج على منصتنا الناشئة و المتجددة و التي نسعى لأن تكون مصدرك لمعلومة عملية مفيدة بدون التوغل كثيرا في مقالات و مواضيع أكاديمية متوفرة ممن هم أكثر مننا خبرة و دراية بها أكاديميا و لكننا بنوعدك أن من خلال منصتنا ستجد ما ينفعك و يفديك في حياتك العملية في صورة كبسولات و نصائح مصغرة نتيجة لسنين كثيرة من الخبرة و المواقف التي سنلخصها لك من خلال منصتنا

كاريري أون لاين – سيصل بك للإحتراف في أقصر وقت.

و بما إني وعدتك إني حاخد بإيدك من البداية فبداية أي مهندس المنطقية هي من لحظة تخرجه و سماعه للأغنية الشهيرة بعين دامعة "الناجح يرفع إيده".

ولكن إنتظر. سيبدأ عملنا معا قبل هذه اللحظة – التي أتمناها لكل منكم – بكثير و كثير جدا. سأبدأ معك من الأجازة الصيفية قبل سنة البكالوريوس. ماذا عليك أن تفعل منذ هذه اللحظة و حتى قبل إعلان النتيجة و زي ما إتفقنا ما الذي ستفعله حتى يفيدك في المستقبل و تحقق به خطوات و خطوات عن أقرانك؟ سألخص لك الإجابة في عدة خطوات 

1.      All English, Alllll the time

مما لا شك فيه أنك على دراية باللغة الإنجليزية نتيجة لدراستك بها لمدة خمس سنوات في الكلية. و لكن دراستك في الكلية تعتمد أكثر على المصطلحات العلمية و الهندسية في مجالك و هذا بالطبع مهم و لكنه ليس الأهم, ليس الأهم على الإطلاق

أنت تتخرج كمهندس هذا أكيد و لكننا نقوم بإعدادك لكي تكون مدير في أقرب وقت بالإضافة أنك كمهندس قد تتعامل مع أجانب و جنسيات كثيرة في أحيان كثيرة و قد يضطرك عملك للسفر و في وقت باكر جدا من إستلامك للوظيفة كل هذا إن كنت لا تمتلك اللغة سيذهب هباء و ستجد نفسك محصورا في أعمال شركات محلية لن تتطور و التطور هنا يشملك أنت و الشركة

و بنظرة سريعة لأي إعلان توظيف على موقعنا ستجد أن الطلاقة في اللغة الإنجليزية (قراءة – كتابة – تحدث – إستماع) مطلوبة تقريبا في كل الشركات حتى المحلية منها فمن يدري متى ستحتاج إلى إستخدام اللغة. طب أعمل إييييه؟

·         إبدأ فورا في التسجيل بدورة لغة إنجليزية في أماكن معروفة و مرموقة في هذا المجال للوصول أسرع لهدفك

·         إن كنت تمتلك بعض المهارة في اللغة قم بتنميتها بالممارسة قدر المستطاع. لو تواجد لك زميل عمل قوما بالتحدث سويا باللغة الإنجليزية بدلا من العربية في كل الأوقات ستجد أن لغتك قد تم إثرؤها بكشل سريع

·         قم بتحميل أفلام أجنبية بدون ترجمة و حاول أن تفهمها. لن تستطيع بالطبع فهم 100% من المصطلحات و لكن إن فهمت المعنى العام فهذا هو المطلوب حتى في حياتك العملية

·         إن تعذر لك الإستماع فحمل ترجمة بنفس اللغة و إقرأ ما يقال ثم بالتدريج قم بإخفاء الترجمة

الخلاصة. تعلمك للغة الإنجليزية هو أساس عملك بعد ذلك و عشان إحنا في كاريري أون لاين بنقولك الكلام المفيد فأني لا أوصي الآن – كما ستجد كثير من زملائك يفعلون – بتعلم لغة ثالثة مثل الألماني و الفرنسي فهناك أشياء أخرى مهمة في بداية حياتك العملية كي تستثمر بها وقتك

2.      برامج الكمبيوتر الأساسية

·         كمهندس بشكل عام و كمهندس إنتاج بشكل خاص فإنك خلال دراستك في الكلية درست برامج كثيرة لإستخدامها في دراستك بعضها البسيط و بعضها المعقد. ستتفاجأ الآن بأن أبسط البرامج هي أهمها بالنسبة لحياتك العملية و عشان احنا بنقدملك كلام بيجيب نتيجة حلخص ليك أهم البرامج بالترتيب من الألف إلى الياء و هم كالتالي:

A.    Basic Excel

·         أيوووه الأكسيل هو أهم برنامج ليك كمهندس و اللي حتستخدمه كثيرا جدا و ستتفاجأ من إمكانياته و إزاي حيساعدك في شغلك. الأكسيل الأساسي - ال–يسك - هو تقريبا محرك ل 50% من شغلك بعد كده إتعلمه و إتعلمه كويس قوي

B.     Advanced Excel

·         حد بيقولي ما كفاية اتعلمت البيسك و شوية كده اتعلم الأدفانسد. حرجع و أقولك مش حتعرف أهمية البرنامج ده غير لما تشتغل خليه هو سلاحك رقم 1 اللي حتتميز بيه عن غيرك

C.    MS Word

·         كتابة التقارير الفنية هي من تفرق المهندس الجيد عن الآخر و لاحقا ستتعلم مني مصطلح دارج هو "الأهم من الشغل ظبط الشغل" مش حتعرف تعمل ده إلا من خلال التقارير الفنية و التقارير الفنية حتكتبها بإحترافية عن طريق الورد

D.    MS Power Point

·         عشان انت مهندس فشغلك محتاج أفكار كتير و الأفكار عشان تطلع من حيز مخك و تفكيرك محتاج إنك تعرضها. مفيش برنامج أسهل و متاح إنك تعرض فيه أفكارك أكثر من الباور بوينت و إبقى فكرني أشرحلك تاني إن "الأهم من الشغل ظبط الشغل" عشان نسيت

E.     Technical software

·         و دي اللي لحد قبل ما تقرا الكلام ده كنت فاكرها أهم البرامج زي على سبيل المثال

·         Auto Cad – Mat Lab – Solid Works…..etc.

هي طبعا مهمة بس المطلوب منك حاليا انك تفضل تستخدمها و متنسهاش

كده خلاص؟ مش ححتاج حاجة تاني في شغلي؟

مين قال كده؟ متنساش إحنا لسه في مرحلة قبل سنة البكالوريوس لسه قدامنا كلام كتير و شغل كتير لحد ما تسمع أغنية "الناجح يرفع إيده" لكن خلي ده في مقالاتنا القادمه إحنا معاك مش حنسيبك لحد ما تحترف مجالك.

المقال (2)

خلصنا في مقالنا السابق الحاجات اللي لازم تعملها قبل ما تدخل سنة البكالوريوس و اللي حتكون أول خطوات تأهيلك لسوق العمل أول ما تخلص دراستك بإذن الله. و عشان تفضل معايا ملخص الحاجات التي كالآتي:

·         تعلم و التدرب بشكل إحترافي على اللغة الإنجليزية

·         تعلم برامج الكمبيوتر الأساسية (Basic Excel – Advanced Excel – MS Word – MS power point – Technical software)

و إنتهينا إتك خلاص دخلت سنة البكالوريوس. إيه بقى سنة البكالوريوس دي؟

-          سنة البكالوريوس حتبدي تحس إنك خلاص بقيت مهندس صغير. في أغلب الجامعات بتبقى الدراسة في السنة دي أبسط من بداية الدراسة في القسم حاجة كده زي تخفيف أحمال. لكن المهم إن حتلاقي معاملة أساتذتك و معيديك إتغيرت و بقة أفضل و تقريبا حتبقوا صحاب ما إنت خلاص إتغربلت 3 سنين في القسم و وصولك للمرحلة دي في حد ذاته إنجاز يستحق التقدير.

-          طيب هل حضرتك مطلوب منك شيء أثناء الدراسة؟ بالتأكيد و بالطبع مش مطلوب منك أثناء دراستك إلا إنك تهتم جدا بدراستك عشان تخلص بقى و تبدي مشوار إحترافك. لكن زي ما مش حطلب منك إنك تاخد أو تتعلم أشياء مفيدة أثناء الدراسة لازم توعدني و تبقى فاهم إنك تبعد عن أي شيء آخر مضر أو فيه مضيعه للوقت. هم مش أكتر من 7 أو 8 شهور و حتكون خلاص سعادة الباشمهندس فخليك ناصح. مش مطلوب منك دلوقتي غير الآتي:

·         إهتم بدراستك

·         قرب من ربنا سبحانه و تعالى و زود من عباداتك

·         إجعل من الرياضة عادة مفيدة متبطلهاش أبدا. حيكون ليها أبلغ التأثير على صفاء ذهنك

·         إقرا لو حتى روايات عادية ده حيفيدك بعدين قدام و حفكرك بيه

حتقولي أنت بتقول إن سنة البكالوريوس من أسهل سنين القسم عادة يعني مفيش حاجة أقدر أعملها في المجال الإحترافي أقدر أخد بيها خطوة زيادة عن أقراني؟

حقولك و دي تيجي؟ أمال أنا معاك ليه في السنة دي. حقولك على الحاجات اللي حتعملها جوة سنة البكالوريوس بشكل إحترافي ميضيعش وقتك و يفيدك في دراستك و مستقبلك بعد كده بإذن الله و هم كالآتي:

1.      مشروع التخرج

-          طبعا مشروع التخرج هو شغلك الشاغل إنت و زمايلك من أول يوم في سنة النهائي. حتلاقي تربيطات المجموعات, كل حد عايز يعمل مشروع تخرج مع دكتور بعينه. ناس حتربط مع طلبة عشان عارفين إن الدكتور المعين ده بيفضل أو بيحب الطلبة دول. كل ده إحنا مرينا بيه و عانينا منه. و عشان أخليك واقف من بعيد ماسك قلمك و بتضحك على اللي بيحصل حديك شوية نصايح عن مشروع التخرج تخليه فايده ليك و نقطة إيجابية في السي في بتاعك تنفعك في شغلك كالآتي:

·         إختار مشروع التخرج في أكتر فرع من فروع هندسة الإنتاج (Machining, Metallurgy, Metrology, Design, Industrial Engineering)   تكون فاهم فيها و بتحبها و تقديراتك فيها مرتفعة

·         لو كل الفروع بالنسبة ليك شبه بعض أنا بنصحك (بشكل شخصي) إنك تعمل مشروعك في Industrial Eng.

·         تمام؟ إخترت الفرع؟  طبعا دلوقتي إنت مستني مني أقولك إختار الدوكتور لكن في خطوة قبل دي لازم تتعمل و حتدربك على شغلك في المستقبل و هي إختيارك لفريق العمل أو مجموعة المشروع

·         مهم جدا يكون بينك و بين مجموعة المشروع توافق. إختاروا بعض من وجهة نظر نقاط القوة و الضعف. يعني يبقى نقطة قوتك بتكمل نقطة ضعف فرد آخر في فريق المشروع و هكذا لحد ما تقفلوا الدايره

·         لازم تحددوا قائد لمجموعة المشروع و أنصحك تكون إنت الشخص ده, طب لو محصلش أو متمش إنتخابك؟ حقولك مش مشكلة ممكن تكون قائد غير مباشر (indirect leader)  و إفتكر المصطلح ده كويس حتحتاجه بعدين

·         بقالنا 5 نقاط لسه متكلمناش عن الدكتور. ركز معايا بقى في الكلام اللي جي كويس قوي. أنا مش عايزك تختار الدكتور اللي بيدي تقديرات حلوة. ولا عايزك تختار الدكتور اللي طالع عليه كلام إنه بيشغل مجموعته بعد التخرج.

·         حتقولي أمال أختار دكتور بيدي تقديرات قليلة و مبيسألش في مجموعته؟ حقولك لازم تفهم الأول إيه هو تعريف مشروع التخرج. مشروع التخرج هو مشروع بحثي أكاديمي لتغطية نقطة أو جزئية معينة غالبا بيبقى شغال عليها الدكتور بتاعك يا في أبحاث يا في جزء عملي كإستشاري مع شركات؟ يعني إيه الكلام ده

·         يعني مشروع التخرج is a win-win situation between professor and students  إنت عايز تتخرج بتقدير و هو عايزه يكمل بيه شغله

·         لذلك و عشان أنا طولت عليك قوي إنت تختار الدكتور اللي مشاريع التخرج بتاعته بتخليك تحتك بسوق العمل كتير. بتخليك تروح تزور شركات و تنفذ مشروعك فيها بقدر الإمكان. بيخليك تتعامل مع مهندسين و رؤساء أقسام و فنيين و عمال بشكل مباشر حتى قبل ما تتخرج و دي بقى الخبرة العظيمة اللي حتفرق بينك و بين أي حد من أقرانك إختار الدكتور اللي بيدي تقديرات أو اللي بيشغل بعد التخرج و دي من أكبر الشائعات طبعا لو في حد إنطبق عليه كل ده إنت أولى بيه. خليك ناصح

2.      تطبيق ما تم دراسته قبل سنة التخرج

-          في المقال اللي فات قلتلك على حاجات تدرسها من قبل سنة التخرج. سواء درستها كلها في نفس الأجازة أو يا حبذا لو كنت درستها طول سنين دراستك كل ده مش حيبقى ليه معنى و حتنساه.

-          يعني حتقولي إنت قعدت تقولي إدرس و إتدرب عشان أنسى اللي درسته و إتدربت عليه؟ حقولك أيوه حتنساه. حتنساه لو مطبقتش اللي درسته عملي تعالى نراجع إنت درست إيه و حتطبقه عملي إزاي عشان مش بس متنسهوش لأ و كمان عشان تكون أخدت بيه خبرة عملية حتنفعك في شغلك بعد كده كالتالي

·         MS Excel: صديقك. قرشك و دراعك. كل حسابات مشروع التخرج, كل المعادلات, كل البيانات و كل التحليلات قم بها عن طريق Excel  حتوفر وقت و مجهود و حتديك ثقة غير طبيعية في أرقامك و حساباتك و حتديك الخبره المناسبة للمرحلة دي في حياتك

·         MS Word: كل التقارير اللي حتطلب منك. كتاب المشروع أو التقرير النهائي للمشروع حيكون من خلاله. مهم جدا التنسيق و إختيار ال Font  المناسب و التدقيق الإملائي كل ده حيفيدك في مشروعك و في خبرتك

·         MS Power point: كل ال Presentation  حتكون من خلاله و لينا في عمل ال Presentations  مواضيع لوحدها لكن ك Tip  صغيره دلوقتي و إنت بتعملها إتبع ال KISS Role – Keep It Smart and Simple

·         English: محتاجه كلام؟ محتاجه تفسير؟ أظن اللي قلناه قبل كده يكفي بس بفكرك حاول مع مجموعة المشروع تتكلموا مع بعض بالإنجليزي أفيد ليكوا

و عشان إحنا في كاريري أون لاين عايزين مصلحتك و مش حنسيبك إلا في وظيفة أحلامك إن شاء الله حقولك على كبسولات كده في شكل نصائح لمشروع التخرج بإختصار شديد كالآتي:

3.      نصائح لمناقشة المشروع

·         إتدرب كتييييير جدا إنت و زمايلك على المناقشة. إعملوا على ال presentation  بروفات كتير

·         متحطش كلمه في ال presentation  إنت مش فاهمها و هاضمها كويس و لو فيه نقطة كده شيلها

·         في بداية ال presentation  حط rules  زي مثلا إغلاق المحمول. شوف عايز تتسأل إمتى بعد كل session  في ال presentation  ولا تطلب بأدب تدوين الأسأله إلى نهاية المناقشة. متخافش من الجزئية دي من هيئة المناقشة خليك جريء بأدب و إحترام و صدقني اللي قصادك لو حس إنك بتتكلم بشكل إحترافي حيحترمك و حيأثر ده في تقييمك

·         توقع في الأسألة ال Worst Case Scenario  إسألوا بعض في المجموعة أسألة غير منطقية و حاولوا تلاقولها أجوبة منطقية. كل ما كان توقعك أكثر إرتحت أكثر في المناقشة

·         إبدأ المناقشة بإسم الله و التوكل على الله و بعض الآيات من كتابك المقدس ولا تنسى رسم إبتسامة الثقة و الملابس ال Formal  و نبرة صوت قوية و واثقة بدون إرتباك. حيساعدك في ده البروفات مع زمايلك

ها نقول مبروك؟ خدنا البكالوريوس خلاص؟ خليك متابعني بقى في المقال القادم عشان الفترة اللي ما بين التخرج و بداية العمل دي أخطر و أهم فتره. مش حنسيبك فيها لوحدك. حرجعك فيها خطوة واحدة بس قبل النتيجة في حاجة لازم تعملها و بعد كده حنشوف مع بعض في فترة بعد التخرج مباشرة المفروض منك تعمل إيه؟

(3)

خلصنا في مقالنا سنة البكالوريوس و تعمل إيه فيها و إزاي تخلي مشروع التخرج بتاعك هو أول خطوات النجاح في الحياة العملية.

النهارده و زي ما قلتلك حنتكلم عن أهم فترة في بداية حياتك العملية و هي الفترة بين التخرج و قبل الحصول على أول وظيفة.

طبعا بعد التخرج بتلاقيك إنت و زمايلك بتبتدوا تفكروا إزاي تعملوا ال CV  بتاعتكم عشان تبتدي تدور على شغل. أنا بقى حديك نصيحة ذهبية عشان تسبق أقرانك بخطوة.

إعمل ال CV  بتاعك من بدري

نصيحتي ليك إنك تبتدي تعمل ال CV  بتاعك قبل ما تاخد البكالريوس من شهر إلى شهرين؟ حتقولي هو أنا ضامن إني حاخد البكالوريوس ولا لأ؟ حقولك إنت في السيرة الذاتية بتاعتك حتكتب ال graduation expected date  و حتسيب تفاصيل تقديرك و تقدير المشروع فاضية .

طيب كخريج جديد أكتب السيرة الذاتية بتاعتي إزاي؟ إيه أهم الحاجات او كل الحاجات و المواضيع اللي لازم ال CV  بتاعي يغطيها؟

الخطوة الأسهل إنك تجيب Template  بتاعة CV  فاضية و تملاها بتفاصيلك إنت و دي منتشره كتير جدا على النت أو إنك تجيب CV  بتاع حد معرفه ليك و تملاه بتفاصيلك إنت و الأسهل من كده إنك تسجل بياناتك في منصتنا و حتلاقي ال CV  بتاعك جاهز بيعرض بياناتك الشخصيه ومهاراتك بشكل جذاب يعزز فرصتك فى الحصول على وظيفه احلامك  و مجانا.

طب إيه هي أهم البيانات اللي تكون عندك في السيرة الذاتية بتاعتك

a.      بياناتك الشخصية

§         يراعى فيها الوضوح التام (الإسم – العنوان – رقم الموبايل – الإيميل)

§         عند كتابة الإيميل يجب أن يكون بشكل إحترافي أي أنه يكتفى بإسمك و بجانبه أرقام تدل مثلا على تاريخ ميلادك و يمنع منعا باتا إستخدام إيميل بإسم مستعار أو ما شابه في التعامل الرسمي

§         وضع صورة من عدمها مختلف عليه و في كل الأحوال ليس بأهمية كبيره

§         الحالة الإجتماعية

§         الموقف المتوقع من التجنيد

b.      Objective

§         و ده معناه ببساطة إيه هدفك و اللي عايز تحققه في حياتك العملية. يراعى فيه إنه يكون مختصر و الكلام يكون مفيد و غير مكرر او محفوظ من سير ذاتيه أخرى

c.       تقديرك التراكمي حتى السنة الثالثة

d.      التدريب الصيفي في الشركات الذي قمت به

§         مدة التدريب في كل شركة و يراعى كتابة إسم الشركة بشكل واضح

§         المواضيع و المجالات التي تم تدريبك عليها

§         ذكر الشهادات التي حصلت عليها من الشركة إن وجدت

e.       الكورسات و الدورات التدريبية اللي حصلت عليها

§         يتم ذكر الكورس بالنقاط التي تمت تغطيتها في ذلك الكورس

§         يتم ذكر الأكاديمية أو الجهة المانحة للكورس (حتى لو منصة أون لاين)

§         يتم ذكر الحصول على الشهادة إن وجدت

f.        مهاراتك اللغوية (راجع المقالات السابقة)

g.      مهاراتك في برامج و تطبيقات الحاسب الآلي (راجع المقالات السابقة)

h.      حتشرح مشروع التخرج و اللي قربت تخلصه مع نبذه عن دورك داخل المشروع (راجع المقال السابق)

i.        لو ليك أعمال خيرية Volunteer activities  إكتبها

j.        هواياتك الخاصة

k.       الناس اللي ممكن اللي بيقرا السيرة الذاتية بتاعتك يرجع ليهم و ذلك بعد الإستئذان منهم

-          النصيحة الذهبية الثانية اليوم. إوعى تحط حاجة في ال CV  بتاعك تكون مش بتقدر تعملها حتى لو في بند الهوايات او حتى في بند ال References  . سوق العمل صغير جدا و قد يكون مي يجري معك المقابلة الشخصية خبير في أحد النقاط المكتوبة داخل سيرتك الذاتية فإن لم تكن متمكن منها سيكون موقف في غاية الإحراج بالنسبة لك.

-          إعلم أيضا أن الغرض من ال CV  هو إستدعاؤك للمقابلة الشخصية و يكون دوره هنا إنتهى و الباقي هو دورك أنت ويعتمد كل الإعتماد على مهاراتك الشخصية و إسلوب إداراتك للمقابلة الشخصية.

-          و من هذا المنطلق فأن أي عرض وظيفي يأتي لك مباشرة من خلال سيرتك الذاتية إحذر منه لأنه 100% عرض وهمي و الغرض منه النصب عليك و إستغلالك فلا تنتبه له

إتخرجنا خلاص؟ حنواجه الحياة العملية؟ إيه هي الخطوة الجاية؟

الحقيقة إن في 3 إحتمالات للخريج الجديد بعد البكالوريوس و هم:

1-     إنتظار موقف الخدمة العسكرية

2-     الحصول على موقف الخدمة العسكرية مباشرة بعد إعلان النتيجة و الحصول على الشهادة (حالات الإعفاء من الخدمة العسكرية)

3-     أن تكون الخريجة مهندسة

-          الحالات رقم 2 و 3 يستنوا معانا شوية حنقولكم تعملوا إيه. أمال الحالة رقم 1 و اللي أكثر من 60% من الخريجين بيكونوا فيها فخليكوا معايا في المقال القادم عشان متضيعوش وقتكم هدر و برضوا الحالات رقم 2 و 3 تقدروا تستفيدوا ببعض النصائح دي

لو عندك اى استفسار او سؤال ممكن ترك تعليق وانا هردعليك مباشره

تابعونا الاسبوع القادم مع #مبادره_كاريرى_اونلاين لتأهيل الراغبين فى العمل فى القطاع الصناعى مجانا على منصتنا

واقرا البوستات اللى فاتت واللى هيشرحلك احنا هنعمل ايه فى المبادره .

كاريرى اونلاين معاك لحد ما تلاقى وظيفه احلامك .

وكمان تقدر تسجل من هنا : https://bit.ly/2y9Ikg2 مجانا لو بتدور على شغل

م. محمد عبد الحميد